ჩვენი ორგანიზაციის ერთ-ერთი მთავარი მიზანია მონაწილეობა მივიღოთ და გავლენა მოვახდინოთ ეროვნულ გარემოსდაცვით პოლიტიკაზე მეცნიერულად დადასტურებული საინფორმაციო ბაზის შექმნის და შესაბამის გადაწყვეტილების მიმღებ პირებთან თანამშრომლობის გზით. 1996 წელს ნაკრესმა, პირველად საქართველოში, განახორციელა ბიომრავალფეროვნების ეროვნული კვლევა (Biodiversity Country Study), რაც იყო პირველი ეროვნული ბიომრავალფეროვნების სტრატეგიისა და მოქმედებათა გეგმის შემუშავების საწინდარი. მოგვიანებით კი ჩვენ ვიყავით ყველა მომდევნო ეროვნული ბიომრავალფეროვნების სტრატეგიისა და მოქმედებათა გეგმის თანაავტორები.

ჩვენი ორგანიზაცია აქტიურადაა ჩართული მთავრობის მიერ ინიცირებული ყველა გარემოსდაცვითი კანონმდებლობისა და პოლიტიკის შემუშავებაში. იმ შემთხვევაში თუ უშუალოდ არ ვმონაწილეობთ მათ მომზადებაში, ჩვენი გუნდი გულდასმით განიხილავს დოკუმენტების პროექტებს და წარადგენს კომენტარებსა და ცვლილებებს, როგორც ეს მიზანშეწონილია ან სხვაგვარად უზრუნველყოფს ექსპერტიზას და პროფესიონალურ დახმარებას.