შესაბამის სახელმწიფო და საერთაშორისო ორგანიზაციებთან თანამშრომლობით, მნიშვნელოვანი პროგრესი იქნა მიღწეული ბუნებრივი სათიბ-საძოვრების მდგრადი მართვის დანერგვის საქმეში, კონკრეტული დაცული ტერიტორიებისთვის საძოვრების მართვის გეგმების შემუშავებითა და ბალახოვანი ეკოსისტემების მდგრადი გამოყენების საერთაშორისოდ აღიარებული საუკეთესო პრაქტიკის პოპულარიზაციის გზით. კვლევების განხორციელებითა და ადგილობრივ თემებთან მჭიდრო თანამშრომლობით, ვმუშაობდით ტრადიციული ძოვების, როგორც მნიშვნელოვანი ეკოლოგიური ფაქტორის აღიარების მიმართულებით ბალახოვანი თანასაზოგადოებების სიჯანსაღისა და ჰაბიტატის ჰეტეროგენურობის შესანარჩუნებლად (განსაკუთრებით, მსხვილი ველური ბალახისმჭამელი ცხოველების არარსებობის შემთხვევაში).

ბუნებრივი სათიბ-საძოვრების მდგრადი მართვისა და კონსერვაციის მიმართულებით, ნაკრესის პრიორიტეტებია:

• საძოვრების მდგრადი მართვის სისტემის ჩამოყალიბების ხელშეწყობა ეროვნულ დონეზე;
• ბალახოვანი ეკოსისტემების მდგრადი მართვისა და მენეჯმენტის რეკომენდაციების შემუშავება;
• საძოვრების მართვის გეგმების შემუშავება ან განახლება.